初八，上午到KIS interview後，帶曦慧去一間幾新的室內遊樂場--Kiddy Village狂歡

佔地不算大，環境略為狹窄，不過對於小朋友而言，是一個頗刺激的遊樂場
麻雀雖小五臟俱全，場內有獨特的氣球屋、波波池、sir滑梯、彈床、隧道、波波噴泉、波波大炮、搖搖馬、健身球、積木、玩具屋、小兒科過山車......配上精美佈置作背景，此場值得一試
不過樓底不高，大人要鑽入遊戲架陪玩並不興鬆
"幻彩氣球屋"最為獨特，暫時未見過類似的設施，七彩氣球再加風扇4個，已令傻瓜興奮
材料和器材都簡單，好多人會話:"車，波之嘛~"。不過無人做得出之嘛。在香港地，設有這個環境可令年幼的小朋友安全地捉波就絕對有吸引力

sir咗3000次都唔厭的sir滑梯，一衝入去就是又深又多波的波波池

小兒科過山車亦是曦慧的最愛

我們由10:30玩到5:30，中途外出食午飯和下午茶，入場時間頗長，極累
$70一大一細算抵玩
最令家長驚喜的是有陪玩員陪著無窮精力的小朋友玩個癲，年青力壯的職員陪玩時絕不偷懶，家長可以放心"柄"埋一邊休息

早排收到KIS來電約初八去Interview，報名費是$1000，已經俾咗無得退
而家曦慧讀開嗰間又無懈可擊，所以無打算轉校，最理想就是讀到高中畢業
既然call我哋去Interview，就抱著去參觀的心態應邀
一來當是我的英語會話實戰，二來當是曦慧的評估，三來希望可以揭開KIS的神秘面紗

當天是上課日，我們並無深入參觀課室或上課狀況
校內上上下下的職員都非常有禮，笑容滿面，感覺良好
我們早到了，自行參觀泳池和洗手間
不久就有位秘書小姐帶我們到校長室
最初處理校長請曦慧獨自入校長室，曦慧不肯，所以我有幸一同進入
是一對一的Interview，甫坐下就獲發一張白紙和鉛筆，之後就問好多問題
考曦慧寫自己的名字、數1-10、唱ABC歌、寫英文字、寫數目字、畫公仔
對一個3歲小朋友來說，真的不易
之後處理校長同我傾吓計，透露今年有好多人報名，來年會開兩班Reception，每班約15-16人
再問埋要唔要坐校巴和訂Lunch Box，當時都意會到她非常滿意我們的表現，似乎即收
該校設有ESL(English as a Second Language)特別班，專門輔助母語並非英語的學生，經過十多分鐘的Interview，處理校長覺得曦慧不需要入ESL特別班，可喜，水準達標

今天，收到Invoice要交deposit，一攝留念

入學Interview戰正式告終

年廿七，曦慧的學校舉行了CNY Concert
晨咁早起身，為睡眼惺忪的曦慧打扮得漂漂亮亮就立即出發

只有我一人出席，9時正把曦慧送抵課室，連隨到School Hall找位子
今次比上次更厲害，只剩下最後幾行有位，上層座位又未開，唯有照坐
不久，上層開放了，大量家長踴上去，我有幸在前排找到個好位
其實坐邊度都一樣削，你睇吓，D人唔係坐o既



基本上，由第二排觀眾開始就係企o既，企地o既又有、企凳o既又有
現場十足Outdoor Concert咁，要幾wild有幾wild
其實下次都唔需要勞煩校工去砌凳仔，d人都唔鍾意坐o既，慳番d力仲好

今次曦慧又係坐台上第1行左邊位置

大約40分鐘的表演，P1依舊佔最重戲份
全程都是唱普通話賀年歌，這校的普通話的水準真的不俗
最後的大合唱最令人嘆為觀止
仲俾我發現Youtube上有另一相關短片，拍攝角度比我的更好
可惜曦慧正正被老師擋著

表演完畢就是拍照時間，我快手快腳影一張便完工然後逃離戰場

再在老遠目送鴨仔回課室

待他們開完新年派對再回校接放學，不過出了個問題嚇到曦慧半死
差不多12點，我行上大斜路準備到學校接曦慧，誰不知竟然看見正在駛走的校巴F上有個貌似曦慧的小女孩，互相你眼望我眼
當時都不太肯定，校巴開始轉彎離開，才看清楚她頭上的頭飾終於確定是曦慧
明明又話當日無校車，點知又被送了上校車，突然間搵鬼去落車處接人咩!?
我立即追車，車又突然停下，門開了，聽到哇哇喊聲
校車嬸嬸扶著喊得死去活來的曦慧落車，落車後好耐都收唔到聲，好似嚇傻咗咁
多得曦慧喊停架車，否則我要跑幾條街去追車了

曦慧的假期正式開始，初十啟市

CNY假期冷知識，八卦一下各大IS的放假狀況，有驚人發現，最長的竟然放到新十五才上學(@_@共17日假期)

曦慧的學校，每星期都會頒發Star of the week
得獎資格唔係幾清楚，段估都唔係頒俾最壞蛋嗰個

上兩星期，曦慧提及好渴望做Star of the week
言談間流露一點點遺憾、失落
人仔細細，有些少目標，實在難得
身為做咗幾十年人的媽媽，深知機遇是在地球上其一難以控制的原素，做得好好都未必有好的回報，唯一可做的就是調整自己的心理狀況......所以我安慰吓佢，然後鼓勵吓佢繼續乖、要留心上課、classwork要做得靚靚...

上星期，class teacher寫手冊話將會頒Star of the week給曦慧
真驚喜，嗰頭講嗰頭有

閱讀通知那刻全屋歡天喜地，多謝媽媽多謝爸爸多謝家姐多謝經理人......wakaka

今日，Star of the week在全班同學的見證下頒發

曦慧放學回家後致電給我報喜，聲音高八度，心情大好

可能係一個豬肉獎
我估攞得呢個獎應該都唔差得去邊
不過有無獎都唔重要，最重要係對曦慧起了一種特殊的作用--有意識去追尋好的目標

上星期曦慧參加了3天的聖誕特別活動
返3天，每天3小時，就像返學一樣，內容圍繞著聖誕節
好耐之前報名，發了消息給一人，好事傳千里，最後幾個舊同學齊齊去
每天一同出發，坐船再轉地鐵
跟舊同學相聚，表面上看來很高興
但實情並不是，呢幾日經常要調解糾紛，又要幫曦慧化險，我身心疲累
由於其中一個小朋友的行為對曦慧影響極深
3日密集相處後，曦慧學埋唔少衰嘢

曦慧本身都唔係善男信女，再加埋那個"榜樣"，事後真係要認真處理
好彩，經過幾天的訓導，曦慧已"康復"了
總算有機會讓她知道怎麼樣是好朋友、怎麼樣是壞朋友

那個小朋友，鍾意搶嘢、扭計、推撞、爭位、玩口水、講嘢粗俗、常亂跑、隨時發爛至五體投地......
程度絕不皮毛，佢係會明知你要的就搶、密集式扭計搞到聲線長期沙啞、坐地鐵又要爭扶手位又要爭座位仲想推其他乘客落地然後自己坐、正經嘢少講但衰嘢再加屎尿屁爛臭講到好似大人講粗口咁就停唔到口、在繁忙街道上甩手狂奔......死未？
如果係我親生的，必定激死我

其實曦慧跟他相處時都唔多愉快，不過即時就唔識借機避開，道行未夠
玩得開心就好地地，但一有爭拗又麻鬼煩

怕怕~

因曦慧的學校有個超長的Term Break，所以我都豪放4日大假陪佢四圍玩
行程緊密，節目豐富

我們趕及於特惠全年通行証的最後限期進入迪士尼樂園遊玩
一場到訪，當然要去新開的反斗奇兵大本營玩一玩

我們排了超過一小時，玩"轉轉彈弓狗"，曦慧覺得十分刺激

我們遠赴馬鞍山某個室內遊樂場喪玩大半日

那天運動量極大，爬上爬落，越玩越忘形

平安夜的晚上，一家人在小島上參加聖誕BBQ活動
全場共有60爐，頂級食材配西北風，別有一番風味

還有健康版本的聖誕老人助慶

聖誕日，飯氏又依舊製作一場聖誕老人漏夜派禮物給小朋友的神話
曦慧一覺醒來發現大門有份大禮物，現後全日都好乖，佢驚聖誕老人會收番佢份禮物
天真無比
我們這天到中環觀賞聖誕大型佈置
        

拆禮物日，我們到海洋公園巡視

食咗好可愛的熊貓造形奶皇包

由朝玩到黃昏才離場，還參加了無厘頭的聖誕故事坊

27日，又有家庭活動，我們到愉景灣食午飯和遊玩



現場有免費郵寄胡桃夾子postcard的活動，曦慧都寄了一張回家
咭上寫了最基本的地址，同埋曦慧最喜歡的字(McCarley, YMCA, Hei Wai)有趣

之後由細路主道，行3步退2步，龜速前行至沙灘和遊樂場

    
接著由碼頭前往愉景北商場再玩


  
    
玩到5點離開，既疲累又興奮

28-30號的3天上午，參加了童軍總會舉辦的聖誕活動
 
28號下午去溜冰，聯同幾個朋友仔跟教練學1小時




29號下午去遊樂場玩

幾天都跟朋友仔一起吃喝玩樂



玩到倦、吃到飽就即場瞓著，真的無憂無慮

元旦日，參加表妹的3歲生日會

假日的最後一天，我們整日留在小島修心養性
最精彩的活動就是跟朋友仔踩單車

精彩假期完滿結束 

自廿年前有數碼相機誕生後，近十年來經各廠商再研發、改良、大量生產，數碼相機已極之普及
逐漸，拍照就是父母為子女"留住每一刻"的唯一方法

每逢帶曦慧四處玩小兒科活動都不難發現到處都是高級攝影師
高級攝影師托住大炮、機關槍在擠擁的地方裡衝鋒陷陣，速度快過快門
一開波已進入忘我境界
烏蠅嬲屎，鏡頭的目標只有一個，其他的人都是陪葬的，踩到、撞低都唔駛旨意有命賠

高級攝影師另一高級之處，並不是捕捉精彩的一刻，而係叫停你製造一個倩影俾佢留住
前幾日在海洋公園遇過，兩兄弟玩限時進行的射水遊戲，入$6玩幾分鐘，玩遊戲時由頭到尾都被攝影之父呼喝著要望鏡頭，每當兩兄弟有"分心"去玩遊戲的一秒，攝影之父立即咆哮兼鬧到兩兄弟狗血淋頭
我們正在隔離玩射水，那打雷般的叫鬧聲嚇到我倆母女幾乎破膽
Time's up, hands down，遊戲完結
攝影之父成功影到幾張相然後展露滿足的笑容，接著問兩兄弟好唔好玩
兩兄弟帶著苦澀的笑容回答"好玩" 

今天，在商場裡見到一個媽媽吩咐年幼的女兒站在一個立體卡通擺設旁邊半蹲半企地擺姿勢
那個姿勢都維持了一段時間，媽媽還未拍到一張滿意的照片
可憐的女兒開始腳陣陣了，喊住叫"我好攰喇，影完未呀?"
由於越企得耐個面口越難睇，要影到張好相都難，繼續...

昨天在DB玩Jump and Stick，又遇到高級攝影師表演高難度拍攝示範
玩者和高級攝影師齊齊上彈床玩，彈床一直彈過不停
彈住都可以不停影相，神乎奇技，這件事例足以推翻腳架的存在價值

影相並非壞事，但本末倒置就稍遜一籌 
因為珍惜每一刻，所以想留住每一刻
啱場合、啱時機咪影囉，影到大家都辛苦就無謂啦
親子玩樂的過程是最重要的，影到靚相就是錦上添花，勉強無靚相

大多數幼稚園都已舉辦了聖誕表演活動
無論表演項目的難度高與否，無論表演者的水準如何，任何一個豆丁勇敢地站台向觀眾表演已夠睇頭，可愛極了，失手的都一樣可愛

近日在forum見一媽媽貼上骨肉的表演片段，然後好似賣廣告咁呼籲各陌生人"like"條片
然後媽媽會收集"like"的人名和頭像再print出嚟做張咭送俾自己的寶貝
讓寶貝知道好多「陌生人」"like"佢個表演

真正意義大極有限，但感覺真的浮誇
父母給一個warm到爆的讚賞已夠滿足了
何需拉埋陌生人落去做場大龍鳳呢!?
還有十幾年要教要學，如果一直保持這種模式，孩子距離「謙厚」越遠

帶曦慧參加了馬寶寶社區農場舉辦的「這是麵包！」工作坊
這是個非一般的烹飪班，環境不吸引，但內容益智
深入農地、了解農民的生活、參觀有機耕作、認識食材的生產過程、學會兩款麵包(玉桂卷和古麥牛屎包)及天然酵母的製作、獲得酸種一份......

我們由青衣乘巴士往粉嶺，1小時的車程確實歡天喜地，曦慧見到大量綠色的士，又有電纜，又有油站，又有劏車房，通通都是奇怪曦慧的最愛
最搞笑係，巴士一過大欖隧道後，環境跟市區截然不同，曦慧非常興奮，好似發現新大陸一樣：嘩~我哋到咗新界喇!"(笑死)

在目的地集合後一團人橫過兩條馬路便到達農場
約廿人一班，當中有3個小朋友，在戶外集體做麵包，幾有型！

我倆手勢純熟，話咁快就搓好麵糰

然後反轉個盆就讓麵糰開始進行發酵，很原始的做法，不用無謂的保鮮紙或濕水廚房紙
笨笨的曦慧以為我們倒晒D嘢落枱，好懊惱！(搞笑)

接著，導師示範用超吸水的Spelt Flour炮製第二款麵包，之後輪到我們為麵糰整型

然後放入盤待焗

繼而為第一件麵糰整型、加糖、加玉桂
再放入盤待焗

大家小休片刻，曦慧找緊時間拿出小食盒，慢慢享用

之後我們大隊出發參觀農田，邊行邊聽"導遊"介紹

穿梭過農田後返回大本營，牛屎包出爐
導師讓我們即場切片再配初榨橄欖油和醋同吃

之後學習養酸種，期間曦慧已昏睡過去了

最後到香噴噴的玉桂卷出爐，塗一點蜜糖便閃靚靚

在農虛挑選些少有機新鮮蔬菜，滿載而歸

曦慧的學校今日舉行了Christmas Concert
事前神神秘秘絕口不提表演的內容，但偶然見到曦慧在家中哼歌跳舞，都估到些少
昨天回校綵排，問吓佢上台唱咩歌啦，答案係:"好多歌o架"

今早未夠9點送曦慧回校，替她換好上台著的衣服，然後把她交給老師
我和飯先生到School hall找個位子坐下
坐第4行，近中央通道位置，都幾滿意 

樓上還有樓座

場刊，封面由P1學生設計
當小表演者進場時，現場開始混亂起來
瘋狂的家長們從四方八面湧上來，你推我撞一番，閃光燈閃過太陽

情況一直沒好轉，就算老師開咪請各位坐低都毫無反應
後面亦有家長上前請他們坐下免得阻礙其他人看表演
依然無改善，面皮的確厚
後面的人湧向前還可以理解，但坐第二行的人都企晒起身就唔知為乜了
我們雖然坐第4行，但都睇唔清楚，九成時間都聞緊前者個pat pat或被路邊人牆包圍著
d相都係求其舉起相機亂影的成果

老師帶領小表演者作最後練習，重溫動作
曦慧在台上第一行



本地部及國際部的校長分別致詞
然後表演正式開始，是一場有關耶穌誕生的故事和歌唱表演
全部唱現場，非常動聽


















半小時左右的表演迅速完畢
真正的大混亂正式開始，大部份家長都湧向前瘋狂地影相
人迫人，距離極近，都唔知影到d咩好相
有小朋友嚇到喊
有家長企晒上椅子上，唔知想點
慶幸曦慧成班都在台上，總算比較安全
之後到課室接曦慧走又是另一場混亂
究竟係整個趨勢都係咁樣丫!?還是只有這批家長係咁樣呢!?