經過一連三天假期,我同曦慧四出活動後,一同染病,病徵相似
傳說話登高係避瘟疫的,我哋竟然反染瘟疫
星期二下午去浸會眼科覆診被發現發燒,護士們大為緊張,如臨大敵
覆診完畢接到妹仔的電話,報告曦慧發燒
嗱嗱臨接曦慧出去睇醫生,呢個時間睇醫生都幾尷尬,心儀的醫生又就收工,流o既醫生就一街都係,所以都係去返曦慧原產地,諗住病歷又齊藥又靚d,點知都遇著流醫生,撞鬼~~
付款時見到我的藥費竟然貴過診金,
唔通開d好嘢俾我!?!?
執藥完畢,非常驚喜~一人一份抗生素先,化啖/止咳/退燒呢d例牌菜各有一份,都話無啖咯~仲化咩啖唧~!~仲有整多一樽止暈&止嘔的藥丸仔俾我,真係體貼入微
結果我和曦慧只吃退燒藥和咳藥水,其他嗰d雪住佢
呢幾日曾經與我們一起吃喝玩樂的親友們,請多加注意身體健康
英國表妹又回港放假，正值秋高氣爽重九日，誠邀我哋兩母女去登高
約咗9:30在大島城等，話早唔早話遲唔遲，要帶住曦慧咁早出到去就要好好部署出門流程
7am就起身梳洗然後煮飯仔、準備尿片/外套/食具/水/零食...預備好飯三小姐一日所需用品
8am叫曦慧起身梳洗然後食奶，繼而再落樓下食早餐
9am順利登上黃巴士
未到9:30已到達大島城候車處
呢個等車的細路的頭髮有點蓬鬆.......
好似未同佢梳頭
轉眼間就等到目標人物了，登上汽車直剷上山頂
嘩~人頭湧湧~曦慧咁大個女都未去過山頂，一去到就開大先，真係揀啱時候
相裡三個人忙於買雪糕和雪條，我們站在一旁等食
邊食邊上路，在森林裡轉完一個又一個彎，人和景都係差不多的，曦慧好快就悶到瞓咗覺了
直至行到終點---山頂廣場，曦慧依然瞓到豬一樣
在百佳購物期間醒了，好精神咁喎，在商場裡四圍遊玩吓先
登高完畢，我哋一行五人去黃埔與另一批親友飲茶
我行咗咁多路，非常肚餓；曦慧瞓咗咁耐覺無郁過，竟然都胃口甚佳...食食食食！
離開茶樓，汽車駛往鬧市，曦慧立即企起身望出窗外發出"嘩"~"嘩"~聲，真係笑死人
為食兵團食意意猶未盡，驅車往花園街光顧台式雪花冰
經過一輪飲飲食食，曦慧又瞓咗覺了
姨姨送我哋返大島城，我哋搭黃巴士回小島去
返到屋企坐不到半小時又出發，帶埋飯先生出去吃大閘蟹
開餐前先到朋友的新居坐一坐，曦慧喺人哋間屋來來回回咁行來行去，BB唔喊即係風水唔錯啦
今晚晚飯的主題係大閘蟹，三五知己一起去殺蟹特別開心
鴻X大閘蟹專門店的大閘蟹原來都係好普通o既，大就夠大囉
食咗兩男一女，滿足！
雖然隻蟹的質素未算好，好彩其他餸菜都唔差
曦慧唔知係咪全日都玩得太多，還是大人忙於拆蟹冷落咗佢，所以好唔耐煩，又叫又喊~~
今日係挪威豬囡+媽咪到訪的大日子
早上傾過電話，預計係下午到小島搶灘
由於恐怕小島的特殊交通令訪客難以應付，所以約定在島外接她們
早上11點帶曦慧去中環與離家整天的飯先生吃個午餐先，曦慧食大人嘢份外開心
食完飯就收到電話了，係時候前往荃灣匯合，立即與飯先生道別
曦慧說時遲那時快已進入睡夢狀態，儲好精神預備見新朋友
當抵達巴士總站時，曦慧叮一聲又起身了，時間剛剛好
等咗一陣終於見到挪威豬囡+媽咪，當時豬囡瞓咗覺
立即帶領她們到小島寒舍一坐
(嘩~講到好似好快咁，其實等車+坐車+行路都差不多用咗1小時:P)
豬囡嚟到新地方絕不感到陌生，見到桶桶、兜兜，開心到不得了
大人們一邊傾計一邊招呼兩位小公主耍樂，都幾唔得閒o架
有新BB入屋，曦慧要花點時間先接受到，開頭係好躁底咁誓要扞衛自己家園
玩多一陣就好D嘞，跟住豬囡去玩，又學豬囡的動作/行為
最搞笑係豬囡餵曦慧飲水水，曦慧又乖乖地飲，豬囡重複咗好幾次餵水，曦慧飲到嘔水都繼續飲，一反常態
有一個大BB嚟到刺激一下曦慧竟然令曦慧又有一大進步，成個下午都跟住豬囡出出入入行嚟行去，又唔多要我拖住，經過D門欄又會好小心咁抬高D隻腳；食嘢又多咗又快咗，大半個muffin和成條香蕉都好快食完。突然間覺得佢大個咗好多！
勢估唔到竟然曦慧會好躁底咁對朋友仔推撞、踢、扯頭髮、拍背...嬲起上嚟仲去踩兔、扯長耳朶！簡直可以用"獸性大發"嚟形容
期待下次同挪威豬囡+媽咪的約會
一早約咗好友今晚去迪士尼黑色世界遊玩，一切由意粉屋開始
先吃個下午茶再一同前往
入場前齊齊掛上halloween裝飾，有紅魔鬼、黑魔鬼，仲有我的南瓜頭
我的南瓜頭非常奪目，引到好多人的注意，又讚口不絕
逛歡一晚，聲都沙埋，多得好友陪同，今晚真係好好玩
園內三間鬼屋各有特色，先闖"大街詭異酒店"，再殺去"森魔詭域"，之後輪到"宇宙深寒"
睇完巡遊再番兜"森魔詭域"
事前低估咗鬼屋的驚嚇程度和高估了自己的膽量，表現極之收家
入到鬼屋竟然唔敢向前行，雙腳啜實地面，D假鬼成日都想撲埋嚟嚇得我想退後，唯有鍊實同伴的手及烏低身縮吓縮吓咁向前行，又尖叫又逛笑，有賴好友半推半抬把我送到出口
巡遊係咁o既
玩完鬼屋又去食嘢醫肚
之後睇煙花，然後四處拍照留念及逛商店
回程時來個賽後檢討，講番起都足以笑到肚痛...酒店裡的假電梯、後面有鬼跟著、左閃右避...哈哈哈哈~~諗起又好笑
玩咗一晚真係攰死，攰到好似去完遠足爬過幾個山頭咁攰，入一入鬼屋真係消耗大
星期六晚返完一晚通宵，第二日只能瞓3個鐘又彈起來
大好星期日，做吓功課食個午飯然後推曦慧外出去街街
這天節目豐富，先在大島匯合Van姐和比利，再到佐敦等齊人就直闖將軍澳
等候期間聞到麵包店傳來陣陣新鮮麵包香，買咗一個俾曦慧做下午茶
仲有Van姐親手餵食，食相極之喉擒~~~"咬死你"
一星期大的小BB，還未有名字
曦慧對BB都幾有興趣
15個月前的曦慧都係咁樣格咋，轉眼間就種大咗好幾倍了
我哋一大棚人睇B吹水食嘢...曦慧都食咗好多，士多啤梨、藍莓、蛋糕...
稍後時間飯先生到達，我們一家三口又到訪住在同一屋苑的友人
坐一陣，哥哥前來載我們一起去麻麻壽宴
曦慧：我愛可樂~~飲飲飲~~
傻曦慧見大人飲可樂又要跟，好啦~派一罐俾佢，不過無開o既
模仿大人飲可樂都樂此不疲，重覆又重覆飲可樂的動作，好好笑~~
整晚曦慧的表現非常良好，無喊過喎，仲識得依指示做好多動作俾人睇添
最犀利o既係...曦慧由出街到回家期間都係小睡過半小時
瞓咁少都仲咁好精神同人玩，應該係遺傳了鐵人的優良特性
機票和酒店已辦妥了,今次的目的地係---韓國首爾
五日四夜的機票連酒店voucher都已到手,非常安心
除非發生打仗或地震啦~~否則無嘢可以阻礙我去旅行
今次訂的酒店非常唔錯,比一般酒店附設更多設備,包括:小廚房,洗衣機,洗衣粉,兒童遊樂場...
仲有託兒服務,託兒服務也有分中央託兒和房間內託兒,真週到,不過應該用唔著
酒店附近有直達機場的巴士,地鐵站也在不遠處,很方便
這酒店應該幾適合湊住小朋友的家庭,十分期待
下一步要做o既係:
為特區護照續證,編排行程,採購嬰兒食物,買冬季童裝...
